حلم الغريب..
صفر ياوابور وقرب الميعاد
انا الشوق واكل قلبى وزاد
صفر ودور عجلاتك
وخلى السرعه تزيد وحياتك
علشان أشوف اللى واخده عقلى
اللى ساكنه فى قلبى
اللى هيه حبى اللى هيه فى دمى وعلى راسى وتاج راسى
اللى بتحر علشانها
وسمعتها بتهمنى وغاليه عليه
اللى قلبى شايل لها كتير من الحنيه
حببتى روحى عقلى انت
انت اسماعيلية
-------------------------------------------
ووقف الوابور فى المحطه
ونزلت وانا معايا سبتى والشنطه
ومشيت خطوه ماقدرتش اكمل
باقى الخطوه
وصوت من جوايا بيزعق ويقول
فين.. فين الولاد الصغيرين
فين الشباب والصبايه الحلوين
فين الهيصه والمه.. فين الضحكه والهمه.
كل ده راح فين. مافيش غير الصمت
الحزين
الشوارع مافيش فيها نور بقت مطفيه
والليل من قبل الليل سابق أوانه خلى الحمام
يدخل فى البنيه
والدكاكين اللى شطب بدرى
واللى فترنته مطفيه
حتى الكلاب فى الحوارى حزينه
على اللى سبوها مرميه
والمدينة الجميلة الزينه الأصيلة
ليه تسبوها وحدها حزينه مطفيه
هو انتم ناسيين انها اسماعيلية
اللى واخده عقلى وماليه قلبى شوق وحنيه
------------------------------------
لازم تعود البسمه و تعود الهمسه
وتعود فى الكوشه عروسه ملاليه
وصحبة الضمه والطبله والسمسميه
لازم تعود أجراس الكنائس ومئاذن
الجوامع من الفجر للعشيه
_----_---------------------------------
وصفر الوابور وصفارته كائنها
بتقول أيه الحكايه.
الحكايه مش عايزه حكايه ولا داعى
أمسك سلاحك وانا أمسك سلاحى
ونضرب اللى عايز يحرمنى من بلدى
شمسى ونهارى أمى وحببتى وبنتى وولدى
قسما بكل شهيد. قسما بكل فجر جديد.. راجعين يابلدى راجعون
يا أجمل أسم يا عود ياسمين
راجعين وياصفارة الوابور
فرحانه با النصر والحريه
راجعين ويا الصحبة والأنسجام
والحمام البنيه
راجعين راجعين يا اسماعيلية
_-------------------------------------
وصفر ياوابور وزود السرعه شويه
صفر وزود عجلاتك وخلى السرعه تزيد وحياتك
نفسى أوصل ياوابور بدرى
علشان أشوف اللى واخده عقلى
اللى ساكنه فى قلبى
اللى حبى. اللى هيه فى دمى
اللى هيه على راسى وتاج راسى
اللى بتحر علشانها
اللى قلبى شايل لها كتير من الحنيه
حبيبتى روحى عقلى انت
انت اسماعيلية
بقلم.. على ابو المجد
سباق
تعليقات
إرسال تعليق